جانیں کبھی جو اپ کے مہمان اگیا

غزل (محمد اسامہ شاہد)

 شہرِ بُتاں میں ناگہاں طُوفان آ گیا

سب کہہ اُٹھے یہ کون ہے انجان آگیا

سودا ہؤا جو حُسن کا بازارِ عیش میں

ہاتھوں میں لے کے ہر کوئی ایمان آ گیا

محفل میں اہلِ علم کی اپنا ہے یہ مقام

نظریں بتا رہی تھیں کہ نادان آ گیا

اپنے تصورات کی دنیا میں کھو کے ہم

بیٹھے ہی تھے کہ آپ کا فرمان آ گیا

خاطر تواضع آپ بھی کرتے بہت ہیں، ہم

جانیں کبھی جو آپ کے مہمان آ گیا

محفل سجائے شہر میں بیٹھا جو خوبرُو

جو بھی گیا سو لَوٹ کے حیران آ گیا

چہرہ بِلا نقاب تھا قسمت سے ایک دن

جھونکا ہَوا کا دید کے دوران آ گیا

سوچا کہ لوں مَیں نام تمہارا ہزار بار

حائل تمہاری یاد میں نسیان آ گیا

شاہد قوافی باندھ کے لکھنے کو تھا غزل

ذہنِ رَسا میں اَور ہی عنوان آ گیا