موقع ملا تو اس نے بھی کیا کیا نہیں کیا

موقع ملا تو اس نے بھی کیا کیا نہیں کیا

رسمِ وفا کو ہم نے بھی رسوا نہیں کیا

ہر اک ستم کو سہہ لیا شکوہ نہیں کیا

کہتے ہیں اس جہان میں بیمارِ عشق کو

اب تک کسی طبیب نے اچھا نہیں کیا

سمجھا گیا تھا جس کو محلے میں پارسا

موقع ملا تو اس نے بھی کیا کیا نہیں کیا

 پھر یاد آ رہی ہے وہی ملتجی نگاہ

اور اشک جس کا راز میں سمجھا نہیں کیا

واعظ کو میکدے میں تھا اک بار لے گیا

پھر اس کے بعد مجھ سے وہ الجھا نہیں کیا

ہم مستقل مزاج ہیں بس ایک بات میں

وہ یہ کہ جو کیا وہ دوبارہ نہیں کیا

بارش کا عذر کر کے بھرم رکھ بھی سکتا تھا

افسوس اس نے کوئی بہانہ نہیں کیا

امیدِ وصل بھی ہے مگر کشمکش ہے شان

اس نے کہا کہ آؤں گا وعدہ نہیں کیا

(ذیشان لاشاری)